غزو نجوم مسرح مصر لأفلام العيد

الجمعة 15 يونيو 2018 02:00
كتب: ندا عصام

نجوم مسرح مصر بيتطوروا بشكل كبير وبقوا موجودين معظم الوقت سواء في عروض مسرح مصر، البرامج، المسلسلات ودلوقتي كمان هيعملوا غزو في أفلام العيد.


أوس أوس

محمد أسامة أو الشهير بـ "أوس أوس" المعروف عنه خفة دمه وتلقائيته في الإفيهات، استعان بيه هشام ماجد وشيكو أبطال فيلم "قلب أمه"، علشان يشارك في الفيلم. ظهر في برومو الفيلم وقال "أوس أوس كاريزما لوحدها".




مصطفى خاطر

مصطفى خاطر قدم في رمضان "ربع رومي" وكمان مثل في "طلق صناعي" دور لطيف جدا. في فيلم "حرب كرموز" في العيد هيغير جلده تمامًا، وهيظهر وهو بيتعرض للتعذيب ويواجه حكم الإعدام شنقًا.




حمدي الميرغني

بعد تجربة ياسمين عبد العزيز مع مصطفى خاطر في مسلسل "هربانة منها" ونجاح التجربة، قررت تستعين بنجم تاني من مسرح مصر وهو حمدي الميرغني في فيلمها الجديد "الأبلة طمطم"، واللي بيظهر  فيه بشخصية المقدم "فارس عز الدين"، تقدر تقول كده عامل فيها "سليم الأنصاري".




محمد عبد الرحمن

بيشارك "توتا" في فيلم "ليلة هنا وسرور" مع محمد إمام وياسمين صبري، ودي مش أول مرة يظهر فيها "توتا" مع محمد إمام، كان معاه قبل كده في فيلم "جحيم في الهند".