بقيادة رامز وفوفا .. فنانين مصر كلهم "في ضهر صلاح"

الأحد 27 مايو 2018 10:57
كتب: ندا عصام

ليلة من أصعب الليالي عاشها الفرعون والنجم المصري محمد صلاح، وأيضًا الجمهور المصري بعد إصابته أمس بالكتف، وخروجه باكيًا  في نهائي كأس أوروبا أمام ريال مدريد لعدم قدرته على استكماله المباراة، وإحتمالية تغيبه عن مونديال روسيا، وكان للفنانين ردود أفعال حول ما جرى لصلاح.. تعالوا نشوف.

كتبت فيفي عبده، عبر حسابها الرسمي بموقع الصور الشهير «إنستجرام»: «سلامتك يا بطل ياللي قاهرهم عين الحسود فيها عود وريني مين ابن المفرومة ده اللي عمل فيك كده وأنا اقطعهولك بسناني. شد حيلك يا بطل و هتبقي زي الفل و مستنينك في كاس العالم إن شاء الله يا فخر مصر. قولوا امين يا رب العالمين».




بينما كتبت أصالة: «سلامة قلبك ياروح قلب الدنيي كلّللللها الله لايضرّك يافخرنا بأخلاقك وموهبتك».



وكتب نجم أراب آيدول أحمد جمال: « ليلة حزينة على الكل خروج صلاح مصاب، احتمال غيابه عن كأس العالم، خسارة دوري الأبطال».




وكان تعليق رامز جلال: « دموعك غاليه يابو مكة وعسي ان تكرهوا شيء وهو خير لكم».



وتمنت الفنانة أنغام، الشفاء لمحمد صلاح، وكتبت: « بإذن الله يقوم بالسلامة.. سلامتك الف سلامة».



وكتبت زينة: « سلامتك يا ابن مصر ستنتصر حتى وانت مصاب الواحد حاسس إن الضربة جت في قلوبنا.. liverpool حتكسب انشاء الله الغل لا دين له سلامتك يا أبو مكة عارف كام بيت في مصر عيط علي وجعك».



وكتبت حنان ترك: « إنت بطل يا صلاح و بإذن الله هتقوم أقوي و تفرحنا.. دموعك غالية علينا».




وكان تعليق هاني سلامة: « افتكر المشهد دا وبإذن الله هتعود أقوى مما كنت».



وكتبت ريهام عبد الغفور على «إنستجرام»: « مفيش حد في مصر موجعتهوش دموعك النهاردة يا mosalah، إن شاء الله تيجي سليمة وترجع تفرحنا في كاس العالم زي ما فرحتنا ووصلتنا هناك من الأول».



وكتبت عبير صبري: « العين حق ..العين فلقت الحجر الف سلامه يافخر مصر».



وكتبت ليلى علوي: « ألف سلامة عليك يا صلاح، ربنا يطمننا عليك».



بينما كتبت حنان مطاوع: « سلامة يا فخر مصر والعرب..يااارب تقوم بالسلامة..يا وجع القلب».