عمرك عرفت هو ليه "باب النجار مخلع".. ؟

الأربعاء 11 يوليو 2018 13:52
كتب: ندا عصام

هو صحيح، "باب النجار مخلع"، واحد من أكثر الأمثال الشعبية الشهيرة اللي بنسمعها في حياتنا، وبنستخدمها، يعني مثلًا  كل صاحب شغلانة المفروض أنه شاطر فيها لكن مش بيهتم بيها عند نفسه، وعلى سبيل المثال دكتور الأسنان تلاقي أسنانه مسوسة، الترزي تلاقي سوستة هدومه مقطوعة، وغيرها من المهن.

الحكاية بتتلخص إن كان في راجل بيشتغل نجار، وفضل يمارس المهنة دي لسنين طويلة جدًا، وبعد ما كبر في السن قرر ترك المهنة ليعيش مع أسرته وأولاده في المنزل، وطلب من صاحب العمل لكن رفض وعرض عليه أنه يستمر في الشغل مقابل مبلغ مادي أكتر، لكن الراجل رفض، وصمم أن صاحب العمل يوافق على الطلب.

وبعد كلام ومفاوضات كتير وافق صاحب العمل علي طلب النجار، ولكن بشرط قبل ما يمشي يبني منزل أخير، فبدأ النجار في البناء، ولكن على غير عادته يعنى مش بنفس الأداء والجودة والمستوى "مستعجل على الإعتزال بقى".

 وبعد كدة انتهى النجار من بناء البيت وسلم المفاتيح لصاحب العمل وكانت المفاجأة الكبيرة بقى إن البيت هدية منه للنجار، زي ما بيقولوا كدة "عربون" محبة وتقدير على كل السنين اللي فاتت.

فندم الرجل جدا على المستوى السىء اللي قدمه في المنزل، وكانت الناس كل ما يعدوا على بيت النجار ويشوفه منظره يقولوا "باب النجار مخلع".