"دي بتقترب علينا"..5 أسئلة عن نهاية مسلسلات رمضان؟

الأحد 10 يونيو 2018 13:05
كتب: ندا عصام

أيام قليلة تفصلنا عن معرفة نهايات مسلسلات رمضان التي تتميز هذا العام بعاملي الإثارة والتشويق، فعلى الرغم من أن هناك كم كبير من المسلسلات، إلا أن هناك أعمال معينة شغلت بال الجمهور، وتفكيره، وجعلته يشتاق لمعرفة نهايتها، بعد الألغاز التي طرحت نفسها على أحداثها، والأسئلة التي ينتظر الجميع إجابتها مع الحلقات الأخيرة.

 

ضد مجهول

المسلسل بقاله كام حلقة بيدور حوالين البحث عن المجرم اللي اغتصب وقتل بنت غادة عبد الرازق "ندى" فالجمهور في الوقت ده في حالة ترقب شديدة، فكان في شكوك كتير حول أكتر من شخص، فهل هيكون زوجها ام حمدي شقيق الكوافيرة أم مايا، ولا غادة، هتفاجأنا كالعادة زي ما حصل قبل كده في مسلسلاتها والنهاية هتبقى غير متوقعة وتصدمنا.

 


أيوب

بعد ما اتسجن مصطفى شعبان، ظلم في الحلقات الأولى من المسلسل، قرر ينتقم أشد انتقام من كل شخص كان سبب في ما حصل له سواء من دياب "منصور" أو محمد لطفي "حسن الوحش"، فياترى نهاية "أيوب" هيتسجن تاني بسبب طرق انتقامه من اللي حواليه ولا إيه اللي هيحصل بالظبط؟

 


الوصية

أكرم حسني أو"ابو" الشخصية اللي بيقدمها شخصية مستهترة جدا، توفي والده وترك له وصية واجبة النفاذ يساعده فيها ابن الدادة أحمد أمين "سمسم"، فهل في النهاية والده "بيومي فؤاد" يفاجأنا ويطلع عايش وعمل كل كده عشان "إبو" إبنه يعتمد على نفسه.

 


رحيم

 ياسر جلال "رحيم" مش عارفين لحد دلوقتي في المسلسل هو شخصية شريرة ولا طيبة الكل بصراحة احتار معاه، فهل نهايته هيتجوز حبيبته "داليا" ولا هيتسجن تاني ولا هيموت ولا إيه بالظبط يا "عم رحيم"؟



الرحلة

المسلسل الأكثر "ألغازا" في رمضان، تفاصيل كثيرة محتاجين نعرفها مع أخر كام حلقة، باسل خياط هيعمل إيه مع ريهام عبد الغفور، هترجعله ولا لأ، ومين هما "الناس اللي بره دول، الوحوش اللي بره دول"، ويا تري كارما هتفضل عايشة مع كيمي ولا هتسيبها، ونهاية قصة أدم هتكون إيه مع سارة مراته.