10 "فُسح" لشم النسيم في "الحِنيِّن"

الاثنين 9 إبريل 2018 11:19
كتب: نهى حمدي

بما إن الدنيا ربيع والجو بديع ونصف المصريين، إجازة بمناسبة عيد شم النسيم، فالخروج و"الفسح" علينا واجب، "طبعًا الكلام ده لا يسري على غلابة القطاع الخاص"، فما عليك إلا أن تحمل حقيبتك وفسيخك ورنجتك وتخرج بهم إلى أحد "الجناين" وإذا كنت من هواة الأكل في البيت "فالليل ونجومه وسهره ملكك يا معلم" وهذه هي الأماكن التي  يمكنك الخروج إليها سواء في الصباح أو المساء"وكله في الحنين".

حديقة الأزهر

التذكرة في حديقة الأزهر لا تتعدى الـ 10 جنيهات للفرد، غير إن المكان واسع وأولادك يقدروا يلعبوا براحتهم، وتقدر تدخل بالأكل وإذا كانت الحالة "مستريحة" في مطاعم هناك تقدر تأكل منها.

الحديقة الدولية 

وللتغيير من "الأزهر بارك" فالحديقة الدولية بديل جيد وسعره "على قد الأيد"، خد بعضك واولادك وعلى هناك مواعيدها من ٨ص–١١م موجوده فى شارع عباس العقاد مدينة نصر.

حديقة الأسماك

وكنوع من التغيير وفسحة "رايقة" حديقة الأسماك في الزمالك، حلوة ومختلفة عن غيرها "بعيدًا عن سمعتها في الأيام العادية" فهي للجميع "مش للحبيبية بس" .

حديقة الأورمان

وفي حالة سكان الجيزة فالخروج إلى الأماكن"اللي فوق ديه مش هتنفعك" لكن أنت لك بديل عظيم وهو حديقة الأورمان واستغل معرض الزهور "ادخل بفسيخ واخرج بورد".

القرية الفرعونية 

"ولو مالكش في جو الجنانين والورد" فالقرية الفرعونية حلوة وهي المكان المناسب الذي تقدر تحيي فيها عيد الفراعنة.

دريم بارك

وإذا ذكرت الخروجات ذكرت دريم بارك ولكن "محتاجة إنك تكون محوش بتاع 200 جنيه" تذاكر والخروجة تكون أحلى مع الأصحاب والأقارب من الشباب.

حديقة الحيوانات 

مازالت هي الأقل سعرًا ومتاحة من الصباح للمساء، فهي فرصة كويسة بان أطفالك يشاهدون الحيوانات عن قرب .

الحسين وشارع المعز

تعتبر من الخروجات التي  لن يكلفك فيها إلا المواصلات و"شوية تسالي" وجمالها كله في الليل .

الحديقة اليابانية 

هي الاختيار الأول لسكان حلوان ومايو، واحلى ما فيها هدوئها وبعض الألعاب التي تلهي فيها أطفالك.

الأهرامات

وخيارك الأخير ممكن يكون الأهرامات لأن هناك "هتحس بإحساس الفراعنة، وإزاي كانوا بيحتفلوا بشم النسيم هناك"، ومنها تركب خيل وكراتة وتأكل فسيخ ورنجة.