من برج الحوت ولحد شوقنا.. مراحل الحب بين الهضبة ودينا الشربيني

الاثنين 30 يوليو 2018 12:08
كتب: ندا عصام

 عمرو دياب بيحب دينا الشربيني، لأ يا جدع ، إزاي بس، لأ هما بيحبوا بعض بس مخبيين، ده عملها أغنية برج الحوت، لا يا عم دي إشاعة، دول هيتجوزا خلاص، يا عم بقولك إشاعة، لا دول بيشجعوا المنتخب مع بعض في روسيا، خلصت خلاص دي عملت تحدي "كيكي"، ورقصت فيه على أغنية شوقنا، في السطرين اللي فاتوا حاولنا نختصر لكم حدوتة كبيرة، ومثيرة للجدل من أول يوم لها، وده طبيعي لأن دينا الشربيني نجمة، ولها جمهورها، والأهم إن عمرو دياب هو النجم الأكثر شعبية في عالمنا العربي، والكل بيتابع كل كلمة منه.


الحدوتة ممكن نحكيها على مرحلتين، المرحلة الأولى كانت عبارة عن إنكار من الطرفين بس بشكل غير مباشر، أو بمعنى أصح الالتزام بالسكوت وعدم الخروج للجمهور بالنفي أو التأكيد، رغم كم الأخبار اللي شافوها منتشرة حول زواجهما أو وجود علاقة عاطفية، لكن الجمهور كعادته أتأكد من صورهم مع بعض، ووجود دينا الشربيني، في اكتر من حفلة للهضبة خلال الفترة الأخيرة، فرواد مواقع التواصل الاجتماعي نشروا صورهم مع بعض معلقين "الهضبة مع فريق العمل"، ودي طبعًا كانت الجملة اللي كاتبها عمرو، أيام ما كانوا هيعملوا مسلسل وكانت عبارة عن إنكار عمرو للعلاقة ولكن بطريقة غير مباشرة، فالجمهور خدها من جانب السخرية، وبرضه مطلعناش بحاجة منهم، عمرو برضه فضل ملتزم الصمت بس في نفس الوقت لما طرح ألبومه السنة اللي فاتت اكتشفنا ان في أغنية بعنوان "برج الحوت"، وطبعًا الكل خد الأغنية على دينا الشربيني، لأنها من نفس البرج، وبعدها احيا حفلة حضرتها دينا، وظهرت وهي تغني وتتمايل على الأغنية، وغناها تاني لما كانوا في روسيا، وظهر على دينا، الخجل.








أما المرحلة الثانية، واللي هنختم بيها فهي مش هنقدر نقول إعلانهم الجواز بطريقة صريحة ومباشرة، لكن في حفل الهضبة الأخير اللي أحياه من كام يوم في اليونان، ظهرت دينا الشربيني، معاه في الحفل ونشر فيديو لهما تم تداوله على مواقع التواصل الاجتماعي "فيسبوك، انستجرام"، ظهرت فيه وهي ترقص على أغنيته الجديدة "ده لو اتساب"، وعايشة حالة سعادة فوق الوصف يعني "كانت طايرة"، والموضوع ماوقفش على كدة بس لأ ده كمان ظهروا في صور جديدة منها، دينا وهي في حضن الهضبة، وبعد اللي احنا حكيناه ده كله، الجمهور كان في حيرة وتفكير لكنهم حسمه الأمر في نقطتين فقط الأولى أن عمرو ودينا متجوزين وبيقضوا شهر العسل في اليونان خصوصا أنه كان هيبقى في جزيرة ميكونوس، والنقطة التانية هي أن تواجدهم هناك هو عبارة عن تحضيرهم لحفل الزفاف، والغريب أنهم لحد دلوقتي مفيش حد طلع يصدق أو يكذب اللي بيتقال، بس نقدر تقول ان الجمهور متأكد بعد كلام مجدي الهواري وشهيرة عن علاقاتهم.