5 حاجات تخليك تتفرج على مباريات الحسم في كأس العالم.. أهمها الحضري

الاثنين 25 يونيو 2018 12:25
كتب: محمد جمال

خلاص ساعات قليلة وتبدأ مرحلة الحسم وتحديد أول مصير في مونديال روسيا 2018 وتحديدًا الساعة الرابعة عصرًا اللي هينطلق فيها مباريات الجولة الثالثة من دور المجموعات بكأس العالم.

طبعًا هي جولة الحسم الأولى لأن من خلالها هيتحدد باقي المجموعات اللي متحددش تأهلها في أول جولتين لكن اللي انتهى من أول مباراتين زي مجموعة مصر كدا وحسم روسيا واوروجواي التأهل خلاص بس مفقدتش الجولة الثالثة أهميتها للفريقين اللي اتأهلوا خاصة وأنه هيحدد ترتيب المجموعة.

النهاردة أول أيام مباريات الحسم واللي هيشهد 4 مباريات مباراتي في المجموعة الأولى ومباراتين في المجموعة الثانية وعلى الرغم من أن المجموعة الأولى اتحسمت والثانية تقريبًا يعني محسومة إلا أن في هناك 5 حاجات ممكن هتخليك تتابع ماتشات النهاردة

 

·       رقم قياسي فريد من نوعه

ينتظر اليوم عصام الحضري حارس مرمى المنتخب الوطني تحقيق رقم قياسي بأنه يكون أكبر لاعب شارك في تاريخ المونديال عن عمر تجاوز الـ45 سنة ويكسر رقم الحارس الكولومبي موندراجون.

واستبعد كوبر في المباراتين اللي فاتوا الحضري من التشكيل الأساسي واعتمد على محمد الشناوي لكن بشكل كبير هسيشارك الحضري النهاردة لكتابة تاريخ في المونديال.

 

·       مصر تبحث عن رد الاعتبار

حاجة كمان هتخليك تحب تتفرج على الماتش وهي أن مصر بتسعى لرد اعتبارها أمام السعودية خاصة وأن آخر مباراة رسمية في بطولة جمعتهم كان في كأس القارات 1999 وساعتها مصر خسرت 5-1 وكان الحضري وقتها اللي واقف حارس مرمى.

 

·       خناقة روسيا وأوروجواي

هتكون مباراة روسيا وأورجواي النهاردة على صفيح ساخن خاصة وأن كل منتخب بيحلم بالصدارة عشان مباراة دور الـ16 تكون أسهل ويلاعب وصيف المجموعة الثانية.

 

·       مفاجأة إيران والمغرب

قد يفجر منتخب إيران مفاجأة في مباراته النهاردة أمام البرتغالي ويفوز عليها ويضمن التأهل على حساب بطل أوروبا خاصة أن اعتماده الأساسي على لونالدو فما بالك بقى لو مكنش النهاردة يومه.

في نفس الوقت ومن ماتش البرتغال المغرب بيقول أنه فريق قوي بس الظروف لم تساعده فما بالك لو فاز على إسبانيا وتعادل البرتغال مثلًا "المجموعة هتتعقد.

 

·       رونالدو ولقب الهداف

من أول مباراة ورونالدو كان متصدر قائمة الهدافين وتحديدًا بعد ما سجل هاتريك في إسبانيا وفي الجولة الثانية نجح في هز شباك المغرب بهدف المباراة الوحيد اللي خلاه 4 أهداف كل دا قبل ماتش إنجلترا وبنما واللي هاري كين قدر يسجل فيه هاتريك وقبلها هدفين في تونس ليقتنص قمة الهدافين من رونالدو.

النهاردة رونالدو هيكون أمامه هدفين الفوز على إيران والتأهل والهدف الثاني العودة لصدارة الهدافين.