5 حاجات خلت الجمهور يتفرج على "أيوب"

الاثنين 4 يونيو 2018 14:30
كتب: ندا عصام

في البداية كدة  لما كان الجمهور بيعرف إن مصطفى شعبان هينافس في رمضان، كان بيبقى في حالة لا مبالاة وردود أفعال معظمها سلبي لأن "شعبان" حصر نفسه خلال السنوات الأخيرة في قالب واحد ولم يفكر في التغير، لكن الصراحة تتقال السنة دي مصطفى شعبان دخل بتقله في مسلسل "أيوب" والناس غيرت فكرتها تمامًا والكل أشاد به من أول حلقة، خصوصًا أنه غير جلده، وأصبح الكل في حالة ترقب ومتشوق مع نهاية كل حلقة، ليسأولوا نفسهم "يا ترى ايه اللي هيحصل.. ؟!"، والمسلسل الحقيقة حقق نجاح ونسب مشاهدة عالية جدًا، وكان في أسباب كتير غير مصطفى شعبان خلت الناس تتابعه، تعالوا نشوف.

 

 مصطفى شعبان "كسر الدنيا"

 

مصطفى شعبان السنة دي غير فكرة الناس عنه تمامًا وأنه بجد فنان موهوب وقادر أنه يقدم حاجات كتير، بس هو اللي حصر نفسه في منطقة معينة، لكن في مسلسل "أيوب" ابتعد عن شخصية الراجل المزواج، وقدم دور شاب بسيط يعمل في بنك يدخل السجن بسبب الديون المتراكمة عليه ليخرج بعد كدة ينتقم، ولاحظنا أن كل مشهد مصطفى، له تعبيرات وجه معبرة وتفاصيل واضحة جدًا، وبعد مرور أكثر من 15 حلقة الكل أشاد بأدائه وأنه بجد قادر على المنافسة الرمضانية بجدارة وهيكسر الدنيا الأيام القادمة.. "كنت فين يا راجل من زمان".

 


آيتن عامر "رسالتك وصلت"

 

آيتن عامر بقي في المسلسل ده حدوتة تانية لوحدها، الناس كلها كرهتها وأثارت غضبهم في دور "سماح" اللي هو معجون بالشر والأنانية ومصلحتها فقط، نجحت آيتن عامر، بدرجة امتياز في أن تقدم الشخصية على أكمل وجه، خصوصًا أنها أول مرة تلعبها، فهي كانت شخصية استفزازية جدًا للجمهور وقلبت السوشيال ميديا بشكل مهول، وتعليقاتهم كانت ما شاء الله كلها دعاء عليها وشتيمة وده دليل على النجاح .. "الرسالة وصلت".




دياب "استمر متوقفش"


دياب الحقيقة كل مرة أدائه بيتطور ويثبتلك إنه موهوب لدرجة كبيرة وأنه مش مغني وبس، شخصية "منصور" اللي بيقدمها في مسلسل "أيوب" السنة دي مختلفة وجديدة، وهو عامل من ضمن عوامل نجاح العمل، والصراحة دياب المفروض كان يدخل المجال ده من زمان أوي لأنه عبقري تمثيل وخسارة السنين اللي ضاعت عليه.. "استمر".




ميريهان حسين "شابوه"

 

بعيدًا عن اللي قدمته ميريهان، السنين اللي فاتت في الدراما، إلا أن شخصية "رغدة" المركبة كانت مغامرة بالنسبة لها، فالدور مختلف من جميع النواحي سواء في الأداء أو تعبيرات الوجه أو طريقة الكلام، وعلى الرغم من أن ظهورها كان بالحجاب وده كان شىء مبهر للجميع خصوصًا أنها تتمتع بأنوثة طاغية، لكنها تخلت عن كل ده، وماكنش فارق معاها ونجحت في الشخصية وعلمت مع الجمهور، وأثارت الجدل، ومن الواضح كدة إن رغدة "ذاكرت كويس جدًا".


 


محمد لطفي "ملك الحنجرة"

دايمًا بيحب التنوع في الأدوار وليس التكرار، هو كاركتر مش شبه حد، ظهر في مع مصطفى شعبان في "أيوب" بشخصية "حسن الوحش" وهي شخصية مليئة بالتفاصيل، والمعروف إن أكتر ما يميز "لطفي" هو صوته "عليه نبرة صوت جبارة".