ضيوف وميكي ولبوسة.. 6 أسباب لنجاح "الوصية"

الأحد 3 يونيو 2018 14:55
كتب: ندا عصام

عايز تعرف إن المسلسل ده ناجح إزاي، شوف السوشيال ميديا اللي هي بقت أسرع طريقة تحكم بها على العمل، وده اللي حصل مع المسلسل الكوميدي "الوصية" بطولة أكرم حسني وأحمد أمين وريم مصطفى، اللي حقق نجاح كبير وملفت للنظر فور عرض أولى حلقاته، "كوميكس" في كل حتة، الناس بقت تقول إفيهات أبطال مسلسل بينهم و بين بعض، "الوصية" عمل حالة بين الناس، وبصراحة لو بتتابع أو عايز تتابع المسلسل، هتلاقي أسباب كتير للنجاح ده، وحاجات كتير تضمن ليك الضحك، وانت بتشوفه، تعالوا نتكلم عنها.

إبو وسمسم

على الرغم من أن كل واحد له جمهوره ومتابعيه، إلا أن أكرم حسني وأحمد أمين، كان في بينهم انسجام وتناغم مش طبيعي في كل المشاهد اللي بتجمعهم ببعض، أكرم حسني أو الشهير بـ "أبو حفيظة"، وأحمد أمين بتاع "البلاتوه"، كانوا بجد توأم ملتصق على الرغم من كل واحد له إفيهاته، وتعبيراته اللي لفتت الأنظار، وردود أفعال الجمهور كانت واضحة من من أول حلقة، وبعد مرور أكثر من 15 حلقة، السوشيال ميديا نشرت فيديوهات لهم من المسلسل تخطت ملايين المشاهدة.. وفي النهاية "اللي مش متابع المسلسل فايته كتير بسبب الإتنين دول بالذات".

 


 

شاهيطاز العلا

"شاهيطاز العلا جلال"، كانت من ضمن الأسباب اللي شدت الجمهور انه يتفرج على "الوصية"، شخصية بعيدة تمامًا عن اللي قدمته ريم مصطفى، خلال السنوات الأخيرة، ده غير الاستايل اللي ظهرت به، واللي اتخلت فيه عن البنت الحلوة أم عيون ملونة، فظهورها كان دايمًا بـ"النضارة" وملابس فورمال أوي، فنجحت بالفعل "شاهي" في تأدية الدور بشكل جيد، وأن تخطف نظرنا بشكلها الجديد، واللي ظهرت به كان جرأة كبيرة منها، ولكن"الجرأة حلوة مفيش كلام".





عم ضياء "أسطورة الطاقة السلبية".

شخصية الفنان المتميز محمد جمعة اللي هو "عم ضياء" في حتة تانية لوحدها في المسلسل، وفي دراما رمضان كلها، الكوميدية من قلب النكد، محدش قدمها قبل كدة بالشكل الجديد ده في كل دراما رمضان، "عم ضياء" ساعي بينشر كل الطاقة السلبية اللي في الدنيا بين الموظفين في شركة أكرم حسني"إبو"، وعلى الرغم من تعبيرات وجهه الكئيبة لدرجة كبيرة إلا أنه قدر يضحكك بجمله الشهيرة "كله رايح"، "كلها مترين في متر"، "مستعجل على الدخول ليه ما كلنا خارجين منها بسرعة"، وغيرها من الجمل اللي انتشرت على السوشيال ميديا بشكل كبير جدًا.. "شابوه محمد جمعة".






ملابس أحمد أمين.. "بهججة"

ملابس أحمد أمين، في "الوصية" حاجة كدة غريبة ومبهجة غير أى استايل في المسلسل، ارتدى تيشرتات مطبوع عليها شخصيات كارتونية مثل "ميكي وبطوط"، مع ألوان جريئة زي البرتقالي والأحمر وغيره، وتداول رواد مواقع التواصل الاجتماعي صور كتير لـ"سمسم" اللي هو أحمد أمين، معبرين عن إعجابهم به، فهل الاستايل هيكون موضة يتبعها الشباب في 2018 ؟!، "ناس كتير نفسها في كده الحقيقة يعني".






ضيوف الشرف

المخرج خالد الحلفاوي، كان عبقري لما استعان بضيوف الشرف أضافوا روح جديدة للمسلسل، فأكتر من ضيف ظهروا بشكل كوميدي "علموا" جدًا مع الناس منهم محمود الليثي وإسلام إبراهيم، من برنامج "Snl" ومحمد طعيمة، من برنامج "البلاتوه"، والمطرب هشام عباس ومحمد ممدوح، وأيمن وتار، فبصراحة ضيوف الشرف "كانوا متنقيين على الفرازة"، وده كان ذكاء كبير جدا من المخرج علشان يضمن استمرار حالة الضحك اكتر وقت ممكن، وعدم شعور المشاهد بالملل.








لبوسة وزهير

الناس كلها بتستني مشاهد خالد كمال "لبوسة" والمساعد واليد اليمنى له اللي هو محمد طلعت "زهير"، مواقفهم الكوميدية مع بعض خلت الكل يتكلم عنهم وبقوا حديث السوشيال ميديا، رغم إنهم مشاهدهم مش كتير، لكن كمية الضحك اللي بيضمنوها للمشاهد في كل حلقة، ومع كل حيلة بتفشل ليهم، عظيمة جدا.